THIAN CHHAN THIH NGAM TV.ANTHONY LALMALSAWMA A LO HAW TA

Zemabawk 10thNovember, 2007 : Ni 11.10.07 (Ningani) tlaia Guwahati lam pan Sumo suamhmang rualin an lo suam tuma huaisen taka beilettu, hliampui tuara hun engemaw chen Silchar lama enkawl, kan veng tlangval Anthony Lalmalsawma chu ni 8.11.07 (Ningani) tlai khan dam takin a rawn thleng ta.

 

Anthony-te chuanna Sumo hi ni 12.10.07 (Zirtawp) zing khan Kabuganj daiah an lo suam a, a suamtute hi mi pariat an ni. Kawnglaiah motor kaltlang theih loha Sumo lo hungin passenger-te an lo suam a ni. Hetia an lo suam hi Anthony leh a thianpa Lalpianmawia, Bawngkawn a mite chuan an bei let a, an beihletna lamah hliam an tuar ta a ni. Lalpianmawia hi a lu ah an sat a, Anthony-a hi Pistol-in a beka an chhut bakah a nak dinglamah an vit a, a nakruh hnuaiber dawttu vit chhumin a thin hnuai lam a khawih bawk. Suamhmangho inthiarfihlim hnu hian Sonai Police Station-ah tlanin FIR an thehlut nghal a, chuta tang chuan zing dar 3:00 ah Gungur damdawi in panin an thian dun hian a tul anga buaipui an nih hnuah Anthony hi zai nghal a ni. Gungur Damdawi in atang hian ni 29.10.07 ah an chhuak a, Silchar Mission Compund-ah innghatin heta tang hian ni 31.10.07 khan Masimpur Military Hospital-ah Check-up te an neih leh a ni.
Hetianga vanduaina an tawh chungchangah hian Sawrkar leh mimal lainatna leh duhsakna, chawimawina leh Mizo kan nihna ze mawi tak nasa takin a lang a ni. A bik takin Silchar L.O Dr.Lalawmpuia’n lo buaipuiin thil tul ang angte a lo tih fel sak a ni. Tin, Anthony hian Sipai lam atangin chawimawina sang Sena Medal a dawng a, hei hian Rs.10,000/- a ken tel bakah a damchhungin thlatin Rs.250/- a dawng bawk ang. Mizoram Home Minister-in Silchar L.O kaltlangin Rs.10,000/- a pe a, Lalpianmawia hnenah Rs.5,000/- a pe bawk. Pu K.Sangthuama, Minister in Rs.5,000/-, MNF Gen.Hqrs in Rs.5,000/- Dr. Lalrotluanga-te nupa, Zemabawkin Rs.1,000/-, MUP Gen.Hqrs in Rs.500/-, Lalrinliana Sailo MLA leh a thiante Rs.4,000/-, MJA Rs.500/-, K.Lalrinliana MLA Rs.1,000/-, Sailothanga Sailo MLA Rs.1,000/-, Maxi Cab Association Rs.2,000/-, Pu Kumthara Khumtung (a chuanna motor neitu) Rs.1,000/-, Zemabawk North YMA Rs.500/- . Tin, Silchar Branch YMA-in Masimpur Hospital atanga Mission Compound panna motor hman man Rs.500/- an tum sak a, Exodus Maxi Cab Service neitupa in Silchar atanga Aizawl haw na Indica Car hman man Rs.2,500/- a tum sak bawk. Heng bakah hian mimal leh pawl anga tanpuitu thahnem tak an awm bawk.
Anthony-a rawn haw hi IMSA (Inter-Sate Maxi Cab Service Association) chuan lo hmuakin Zarkawtah chawimawina hun an hmanga, chawimawina thilpek chi hrang hrang an pek bakah Central YMA President Pu JH Zoremthanga chuan ‘Tawlhlohpuan’ a bah tir a ni. Zarkawt atang hian kan Branch-in va hruaiin Venglai Bazar-ah lo hmuakin chawimawina hun hman a ni.

 

Tv.Anthony-a te suamtute hi mi pariat an ni a, Police Station-a FIR an thehluhna Case No. chu 285/07 niin IPC 395/397 a charge an ni. Heng suamhmangte Sumo hman hi AS 11C 1655, Sonabarighat-a Tualchhung Political Party pakhat hruaitu Pi Reena Begum Choudhury hminga Register a ni. FIR thehluh anih hian Police-te chuan theihtawp chhuahin suamhmangho hi an zawng nghal char char a, ni 30.10.07 (Thawhleh) zan dar 11:00 vel khan Anthony-a te an suamna hmun ngaiah chiah midang suam leh an lo tum chu Police-te hian an man ta a ni. An zinga pali chu an tlanbo hman a, pali an man te hian an hming leh an address-te an sawi vek tho avangin man leh thuai an nih ngei a rinawm. Heng an mi mante hnen atang hian mi suam nana an hman hmanraw chi hrang hrang an man nual a, ralthuam an ken zingah a tak aiin a lem a tam zawk thu dawn a ni.
Suamhmang an mante hming :

1. Sebul Hussein Laskar Danahari Part-II
2. Abdul Nur Talukdar Danahari Part-II
3. Shahjahan Hussein Barbhuiya (Driver) Danahari Part-II
4. Komoro Uddin